Ra’iisul Wasaare Khayre Oo Kormeeray Xarunta Maamulka Gobalka Banaadir

Muqdisho, September 16, 2018—Ra’iisul wasaaraha xukuummadda federaalka Soomaaliya, mudane Xasan Cali khayre, oo maanta kormeer ku tegay xarunta maamulka gobalka Banaadir, ayaa kulan la qaatay guddoomiyaha gobalka, ku-xigeennadiisa iyo xoghayaha gobalka.

Guddoomiyaha gobalka Banaadir, Eng. Cabdiraxmaan Cusmaan (Yariisow) oo kulanka ka war bixiyay ayaa sheegay in ra’iisul wasaaruhu uu kala hadlay dardar-gelinta dadaallada sugidda amniga iyo fududaynta adeegyada bulshada.

Eng. Cabdiraxmaan Cusmaan (Yariisow) ayaa sheegay in ra’iisul wasaaruhu uu maamulka gobalka ku dhiirri geliyay in ay sii laba jibbaaraan hir-gelinta adeegyada kala duwan ee bulshada si dhammaan bulshada gobalku ay u helaan adeeg kasta oo qayb ka qaadanaya horumarka.

Kormeerka maanta ayaa qayb ka ah hawlaha kor-joogteyna ee R’iisul wasaaruhu kula socdo shaqooyinka hey’adaha dawladda, laguna xaqiijinayo isla xisaabtanka iyo daah-furnaanta, si loola socdo horumarrada la gaaray iyo dar-dar gelinta qorshayaasha hor-tebinta leh ee u yaalla hay’adaha dawladda.

Xafiiska Warbaahinta iyo Xiriirka 
Muqdisho, Soomaaliya 
www.opm.gov.so
media@opm.gov.so 
Twitter: @SomaliPM
https://www.facebook.com/OPMSomalia