𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐤𝐮 𝐗𝐢𝐠𝐞𝐞𝐧𝐤𝐚 𝐗𝐮𝐤𝐮𝐮𝐦𝐚𝐝𝐝𝐚 𝐨𝐨 𝐬𝐡𝐚𝐜𝐚𝐛𝐤𝐚 𝐜𝐚𝐚𝐬𝐢𝐦𝐚𝐝𝐝𝐚 𝐤𝐮𝐥𝐚 𝐭𝐮𝐤𝐚𝐝𝐚𝐲 𝐌𝐚𝐬𝐣𝐢𝐝𝐤𝐚 𝐂𝐚𝐥𝐢 𝐉𝐢𝐦𝐜𝐚𝐚𝐥𝐞

Ra’iisul Wasaare ku-xigeenka Xukuumadda Jamhuuriyadda Federaalka Soomaaliya, Mudane Cabdisalaam Cabdi Cali, ayaa Salaadda Ciidul Fidriga kumannaan shacab ah kula tukaday Masjidka Cali Jimcaale ee caasimadda Muqdisho.

Mudane Cabdisalaam, ayaa hambalyo gaar ah u diray ciidamada geesiyaasha ah ee ku sugan furimaha dagaalka, kuwaas oo habeen iyo dharaarba u taagan ilaalinta dadka iyo dalka, dhowaana ka guuleysan doona kooxaha Khawaarijta ah.

“Waxaan ugu hambalyeynayaa shacabka Soomaaliyeed munaasabadda Ciidul Fidriga, waxaan si gaar ah hambalyo ugu dirayaa geesiyaasha Soomaaliyeed ee maanta ku ciidaya jiidaha hore ee dagaalka.

“Intii lagu jiray bisha Ramadaan, waxaad muujiseen midnimo iyo isku duubni, sidaas darteed waxaa loo baahan yahay in la xoojiyo wada shaqeynta shacabka iyo hay’adaha amniga si bulshada Soomaaliyeed u helaan amni iyo xasillooni”, ayuu yiri Ra’iisul Wasaare ku-xigeenku.

Ra’iisul Wasaare ku-xigeenka, ayaa sheegay in la gaaray waqtigii loo midoobi lahaa ciribtirka kooxaha Khawaarijta ah, si isku mid ahna loo garab istaagi lahaa ciidamada xoogga dalka iyo kuwa deegaanka ee halganka ugu jira sidii ay dalkeenna uga sifeyn lahaayeen kooxaha arxanka daran ee Khawaarijta.

— Dhammaad —